莫斯科基本行程推介（一日遊及多日遊）

莫斯科🇷🇺基本行程推介（一日遊及多日遊）

(某年夏天，豁出去不理世俗眼光，趴喺度唔知做乜)

唔使多講，去莫斯科唔去紅場就等於冇去過咁~其實佢就係個大廣場咁，一日到黑都好鬼多人。呢幾年，我諗我夾夾埋埋去超過10次😂淨係舊年，已經去咗三次..

紅場最具特色就係可以見到洋蔥頭教堂（聖巴素教堂），然後右面就係克里姆林宮，左面就係好有歐洲風情嘅古姆百貨公司～然後沿着nikolskaya街行，就會見到喀山大教堂，呢個教堂特別靚因為佢係粉紅色同埋粉綠色㗎～

D教堂外觀就得，唔使專登俾錢入去參觀，外面睇會比入邊睇好睇😂

莫斯科市區基本款一日行程大概就係：

克里姆林宮>紅場>百貨>阿爾巴特步行街>莫斯科地鐵遊

咁樣基本上就一日喇～克里姆林宮最好先網上購票，如果唔係現場排隊等好耐～

克里姆林宮官網：
https://www.kreml.ru/zh-CN/museums-moscow-kremlin/

如果有多幾日嘅話行程可以選擇：
-一隻螞蟻市場+木造宮殿(之前介紹過)

-近郊金環小鎮一日遊+自畫套娃（有時間的話過呢個周邊遊都好推薦去下。交通方面可以自己搭火車去，又或者幾百蚊報個一日團都得）

-radisson cruise 遊船都唔錯，可以一邊欣賞河岸風光，一邊食飯～

http://new.radisson-cruise.ru/tickets/?lang=en

以下配圖求其搵返之前嘅紅場大雜燴😂其他景點嗰啲相唔知飛晒去邊

再到某年冬天，在聖巴素教堂外打雪扙

走來一隻得意狗仔摸下

經典嘅洋蔥頭教堂

到咗去年年尾，帶埋父母嚟睇吓～～

喀山教堂

喀山教堂顏色好靚架，不過呢張求其影

聖巴素大教堂對面的歷史博物館，紅色一座，一樣好起眼

莫斯科特色購物景點-一隻螞蟻跳蝨市場

莫斯科特色購物景點-一隻螞蟻跳蝨市場🏰

今日又繼續俄羅斯系列，就快講完喇！Izmayzovo market又名一隻螞蟻，其實係佢俄文嘅發音嘅中文改編而成～個名幾過癮～

去得俄羅斯梗係要買番隻套娃，雖然唔知買黎做乜，擺喺度裝飾留個紀念囉😂

一隻螞蟻市場外型已經成個城堡咁好多顏色好適合影相，夏天去就色彩繽紛，冬天去就好有童話feel！佢係一個工藝品市場，然後入面有好多小攤販賣各種紀念品，主要都係套娃～

你比較多幾檔你就會發現啲套娃唔同價錢有唔同嘅質量，一分錢一分貨，好平嗰啲最入面嗰一隻娃面目猙獰😂隻眼畫到好歪斜～～不過送俾人嘅買平啲OK，自用嘅就買隻靚啲㗎啦。呢度啲小販係可以講價㗎！唔好怕羞，50%左右劈價～

另外有一樣野要提醒大家，購物同時保護財物，注意扒手！

地址:
Izmaylovskoye Shosse, 73Ж, строение 2, Moskva, 俄羅斯, 105122

開放時間：
大部份鋪頭都係星期六日先開門，如果平日去得大約三份一鋪頭會開

交通：
地鐵3號線Партизанская站，步行3分鐘，再唔係坐uber

夏天特別色彩鮮艷

冬天就好有童話feel

質素好啲嘅套娃，肥肥矮矮好得意

呢啲款式就傳統啲

呢個手工都好靚

食物區

幾間莫斯科餐廳推介

幾間莫斯科餐廳推介😋🍽

繼續未完嘅俄羅斯系列~出嚟玩好西當然重要啦～去年我都去過幾次莫斯科，食咗啲餐廳，有啲覺得唔錯，有啲正垃圾，喺度介紹番👇🏼

早餐/下午茶推介

Breakfast cafe
地址：Malaya Nikitskaya Ulitsa, 2/1 стр. 1, Moskva, 俄羅斯, 121069

Friends forever cafe
地址：Malaya Nikitskaya Ulitsa, 2/1 стр.1, Moskva, 俄羅斯, 121069

Scramble
地址：Ulitsa Spiridonovka, 24, к.1, Moskva, 俄羅斯, 123001

呢三間都係食早餐同埋蛋糕🍰之類嘅食物！勁有IG feel，食物好睇又好食，有咸又有甜，唔貴～飲品都超靚，然後裝修又係嗰啲靚Cafe咁嘅樣，好適合影相～適合早餐或者下午茶來食~~

午餐或晚餐正餐推介

平價之選：

Odessa-mama
呢間餐廳有三個分店
餐廳環境都唔錯，有室外有室內位置，人均消費$100港幣多啲，係一個俄羅斯機長同事帶我去嘅～～食嘅係俄菜，其中以羅宋湯，烤魚，蘑菇等等菜式都好好食～其實每一道菜都唔錯～亂點無問題，一款菜式大概都係五六十港幣左右，local介紹絕對冇死！

地址:

分店一
Krivokolennyy Pereulok, 10 строение 5, Moskva, 俄羅斯, 101000

分店二
Ukrainskiy Bul'var, 7, Moskva, 俄羅斯, 121059

分店三
Shabolovka St, 14 строение 2, Moskva, 俄羅斯, 119049

官網可以參考下佢個中文餐牌：
cafeodessa.ru

高級餐廳之選：

White rabbit 白兔餐廳
一間幾出名，貴價啲嘅西餐廳，人均$500港幣左右（慳住食），唔係特別慳住食頭盤主菜湯甜品叫齊就$800-1000左右～當朝聖咁可以去一次。我就對價錢卻步左所以冇去，但係我啲同事就好多都去過，環境一流！半圓形嘅玻璃穹頂超靚～需要打電話先預約。然後建議唔好點海鮮，海鮮係跟重量計，所以會好貴。要食就食肉啦明碼實價啲😛（同埋食環境）

地址：
Smolenskaya Square, 3, Moskva, 俄羅斯, 121099

官網（碌落底有中文餐牌可以睇定先）：
whiterabbitmoscow.ru

然後有一間終極唔推薦嘅豪華餐廳❌❌❌

Tvrandot
呢一間都係一間網紅餐廳，勁多人推介，最平都要五六百蚊一位(有自助餐好似平啲$400左右)，你上網搵好容易會搵到佢，係好多人食豪少少嘅選擇。重金打造入面勁豪華好似宮殿咁！叫做食裝修~~

睇相超靚，但係實物就土豪feel，然後上菜速度終極慢(等成個鐘先上得少少野)，然後服務麻麻，好多大陸客。然後食物質素普通，基本上都係食亞洲嘢，例如嗰啲壽司同埋點心，香港人去唔會覺得有咩特別，簡直就係旅遊團團餐嘅地方，然後份量超小，食咗大幾舊水，返酒店全部人要去樓下買麥當勞😂

所以唔好去啊！一個字-伏呀！所以嗰啲地址電話官網嗰啲我唔寫..就草草up一張相做reference 啦

白兔餐廳，環境真係無得輸（網上圖片，因為太貴我冇食）

白兔餐廳嘅食物

呢啲就全部自己影嘅，頭三間Cafe，食早餐或者下午茶一流！好睇又好味

平價俄菜Odessa mama ，味道不錯

Breakfast cafe同Friends forever cafe環境

呢個係中伏餐廳Tvrandot

童話味十足！俄羅斯莫斯科近郊木造宮殿-科洛姆莊園Wooden Palace of Tsar Alexei Mikhailovich

童話味十足！俄羅斯莫斯科近郊木造宮殿-科洛姆莊園Wooden Palace of Tsar Alexei Mikhailovich🏰

其實我並冇特別鍾意俄羅斯，雖然嚟緊三月份我又去俄羅斯玩（不過係去西伯利亞）～既然近排講開，所以我就一口氣講晒佢先！講完之後先可打包成個懶人包～

去莫斯科通常最主要就係搭地鐵，紅場，克里姆林宮，金環呢啲景點～木造宮殿呢個地方比較少人介紹，其實佢都係聯合國教科文組織世界文化遺產～

博物館呀紀念碑之類，我興趣不大，可能因為我冇乜文化😝

如果去睇北極光，然後順便會喺莫斯科停留三兩日嘅，可以嚟呢個沙俄時期留下嘅莊園參觀下～

佢係莫斯科郊遊嘅好地方！面積大，遊客唔多～主要分為兩個部分：北部的白色建築群+南部的大型木質宮殿，北部的建築群我就冇去，而南部嘅木質宮殿色彩斑斕且內部華麗～好值得入去睇吓，入去需要着鞋套，因為驚損毁木地板～

莊園位於市區南面，離市中心有d遠，但地鐵很方便，再唔係搭uber前往都又平又方便（強烈建議）。玩呢個莊園大約需時半日。另建議用手機地圖googlemap導航，如果唔係遊客稀少，有河有山有樹嘅莊園裏會容蕩失路。

地址：
просп. Андропова, 39

到達方式：
搭乘地鐵2號線至科洛姆納站（Коломенская），或搭乘219、263、291、299、608路公交，67路無軌電車可到達北門；搭乘地鐵2、11號線至卡希拉站（Каширская），或搭乘263、269、275、291、299路公交，67、71無軌電車可到達南門

開放時間：莊園每天免費開放，小教堂免費，白石主升天教堂和木質宮殿收費。木質宮殿每天10:00-18:00，週六11:00-19:00；週一休息。

推薦遊覽路線：可從地鐵2號線卡洛明斯克站下車，一直順著主路邊的步行道往南走15分鐘左右，進入北門。玩完北部的建築群後穿越中心園林，到達南部的木質宮殿參觀，再從南門出去就剛好是地鐵2號線的下一站入口。

外觀已經好有特色

成個都係木造！然後屋頂綠色嗰啲瓦仔深深淺淺咁好靚

入面就金碧輝煌

都幾氣派㗎

綠色嘅洋蔥頂

 

我有一個俄羅斯機頭同事隨行，去邊都特別方便

拍咗一個影片，拍得有啲搖，忍耐下😂

摩爾曼斯克市內景觀-列寧號核動力破冰船

摩爾曼斯克市內景觀-列寧號核動力破冰船🚢

講極都仲有😅因為咁諗下就發現仲有啲未講完～

摩爾曼斯克城市本身入邊真係冇乜嘢玩，呢隻破冰船算係唯一嘅大景點（仲有個二戰紀念碑不過我冇睇，仲有值得打卡嘅麥當勞囉，係咁多）。

列寧號核動力破冰船係世界上第一隻用原子能反應堆產生能量而行駛嘅船隻🚢

1959年首航，1989年退役。仲老過我阿媽😂主要用來喺北冰洋地區考察同埋救援。依家停泊咗喺摩爾曼斯克港口成為咗一個博物館俾人參觀～

不過上船之後一定要跟導賞團，有英文同埋俄文團，我唔好彩，咁啱嗰個時間係俄文團，所以乜都聽唔明，唯有周圍望下啦～

隻船入面好大，有廚房，醫療房，船長室，會議廳，核反應堆等等。入邊啲嘢幾復古風，好唔好睇就見仁見智啦～不過山長水遠嚟到咪到此一遊一下囉。

重要提示：
-門票係上船先買，唔係嗰間藍色屋買，我就係去錯地方結果就要等一個鐘聽俄文😅

-一日有五場：下午12點，一點，兩點，三點，四點 （星期一二休館）

摩爾曼斯克周邊一日遊-北冰洋上的小漁村teriberka

摩爾曼斯克周邊一日遊-北冰洋上的小漁村teriberka

諗住整理北極光懶人包嘅時候，諗清楚仲有啲咩未講~就醒起無介紹捷里別爾卡~除咗夜晚睇極光，日間都可以有其他活動，去teriberka 就係一個好好嘅選擇！

捷里別爾卡距離摩爾曼斯克大約兩個鐘頭車程，位於北冰洋嘅邊緣，可以即日來回，又或者可以住喺嗰度睇極光都得！沿途風景好靚～雖然冇乜大型景點，亦都冇乜餐廳（得一間，但係佢有皇帝蟹食），但係沿途風光都已經值得去睇睇～

沿途比較有特色嘅有湖，有子彈洞嘅警車，廢船碼頭（就係喺嗰度買咗隻三百幾蚊嘅皇帝蟹），瀑布，石陣，之後就會去到海邊（北冰洋真係凍到震！），有沙灘上嘅大鞦韆等等～我表達得衰好似好唔吸引咁😂唔識形容呀，看圖說故事吧..

至於交通方式佢有小巴或者包車都可以去到，強烈建議包車，一來時間比較彈性，二來都唔貴。包車之前就介紹咗幾個人，有興趣就睇返啦～

唔講咁多，今次多圖，相入邊會再有描述😛懶人包仲未得啊，仲有少少未講完，明天繼續

廢船碼頭

北冰洋邊沙灘上嘅大鞦韆

廢棄警車，充滿子彈窿

沿途風光，10月地下已經有啲雪

廢船碼頭

剩返啲魚骨型嘅船架

呢個地方特別有型

路上經過嘅湖

我哋坐嘅車

遠睇勁似一個真人！

係啲人行過路過幫佢着晒衫，真係好似人

經過覺得幾靚又落下車，另一個湖

南方人特別鍾意玩雪

沿途風光

一種苔，據說可以止咳，不過唔知點用

個個都要來嘅北冰洋邊，同佢個名一樣，個字形容-凍！

見到彩虹呀

一個小瀑布

漁村上唯一嘅餐廳，有皇帝蟹食

海灘上又見到彩虹呀

小漁村

石頭陣

我又砌一個，據說係祈福用嘅

廢船碼頭嘅影片