2019年1月11日 星期五

俄羅斯摩爾曼斯克-四個市區出發追北極光tour及包車機場接送大比拼

俄羅斯摩爾曼斯克-四個市區出發追北極光tour及包車機場接送大比拼🌌



(上圖係Murmansk tour)


我繼續我嘅長篇大論俄羅斯極光攻略!

第一句先講明絕非廣告,我一蚊收益都冇㗎,我有返工唔使呢啲賺錢😝
極光tour價錢一般由$3000-7000盧布左右(約$338-790港幣)。非專業嗰啲2000-2500盧布都有,不過太平嗰啲我冇考慮,因為我對相片質素係有一定嘅要求,雖然我好慳錢,但我絕對唔介意比多一百幾十,等我可以留下漂亮嘅極光合照📷
全部公司價錢包含嘅嘢基本上一樣:酒店接送+專業極光人像照片send返比你+茶咖啡小食。時間都差不多,不過開始時間日日都唔同睇天氣,一般4-6小時左右,然後如果唔好彩睇唔到第二日好似唔使收錢,定係半價咁樣間間都差唔多(我冇睇唔到所以唔肯定價錢)。

相片係我對極光團最大嘅考慮,所以比較左四間公司(其中有兩間只係一個年輕攝影師兼司機,唔知算唔算係公司),四個都可以用WhatsApp或者WeChat聯絡,好方便。最後我用左其中兩間,再用左一間嘅包車,以下比拼一下各家特點:

第一間-Nord tour
好處及壞處:
-規模最大最正式,應該係最早開始做追光團嘅公司,wechat問價會email 回覆
-由於已經做起左,價錢特別貴
-相片質素極佳,專業攝影師隨行
-於很受遊客歡迎,所以有機會要同其他人拼團,咁攝影師就可能冇咁多時間淨係幫你影相

收費:
1 人包車 - 18000 RUB
2 人包車- 9000 一位 (total 18000)
3 人包車 - 7500 一位 (total 22500)
4 人包車 - 7000 一位 (total 28000)
10歲以下小童減2000 RUB,11-16歲青年減1000RUB

如果當日剛好有其他人拼團,一人收費就$7000RUB

我去俄羅斯追光無非都係為咗平,雖然佢啲相真係好穩陣好吸引,但太貴所以最後冇揀佢
https://nordtours.ru/en/
WeChat ID:wxid_hknnxi04vzbs22
What’s app: +79-217092546


第二間-Michael 攝影師


-收費比較平,因為佢係一個”個人”,並唔係乜公司,價錢可以商量,人多可以叫佢比折扣,人少都可以同佢傾下,反正佢係一個人比較易話為,你搵佢同佢講Joanne介紹佢話會計平啲(你自己deal,我唔知幾多)
-小團包車,剩係得我同行四個人
-攝影技術好,裝備充足👍🏼仲要超有熱誠,見到極光爆發佢都狂嗌😂狂影我地幾個人,絕不敷衍,係咁影我哋到我唔想影自己話夠,最後大約影左百幾張
-後生仔,識英文,雖然唔係好好但係絕對溝通到,呢個係重點
-經驗豐富,我哋跟佢嗰晚雖然指數高,但不停起雲,佢就車住我哋係咁望住個天轉地點,尋找冇雲嘅區域
-停留地點多,佢自己有好多心水嘅位置,我哋總共換咗四個地點
-絕對唔會匆忙,都唔會催促,我都係玩到自己夠皮嗌走(我個人咁爛玩好少夠皮😂所以真係玩咗好耐)

-時間:八點酒店接你,我大約玩到一點幾返去

-缺點真係冇乜,或者係勁chur我哋影人像極光合照,令到我冇時間玩我自己部相機,影唔到浄風景極光,我部相機幾乎冇影過相🤦🏾‍♀️

-之前我去阿拉斯加追光掛住影,到大爆發一刻我掛住喺度搞setting,無用眼睛好好欣賞,今次我醒目,我完全唔影,爆發一刻我淨係睇!相片我交俾Michael
-仲有一個缺點就係佢WeChat回覆得好慢

收費:$4000RUB一位,如果睇唔到好似半價(我冇睇唔到所以唔肯定),佢仲有其他日間活動包括teriberka day tour,薩米村一日遊,husky park tour,雪上電單車,機場接送等等,基本上就係嗰度有嘅活動都可以搵佢,book 極光tour再搵佢報其他活動可以八折,其他活動佢都會幫你影相,呢個係最大嘅好處~

Micheal的WeChat ID:
murmansutki
WhatsApp:
+79217083078
Micheal的Facebook page名,入面可以見到佢啲相:
Aurora Tour Tonight


第三間-Murmansk tour
-其實佢都係一個”個人”可能同幾個朋友一齊玩嘅tour公司仔,講完唔記得咗佢叫咩名添
-我係IG搵佢返嚟,睇中佢嘅就係佢啲相質素好好,角度構圖全部都靚,而且價錢唔貴
-缺點係佢唔識英文,真係溝通唔到唯有指手畫腳
-佢係一架八人定係九人車,我上車嗰陣見到已經有四個人,仲諗住有其他遊客拼團,點知唔係原來都係佢啲friend😂成班一齊出嚟陪佢,所以簡單來講其實我一行四人都係包車
-因為係一個人,所以好casual,你唔鍾意就可以轉地點,當日我都轉左一個地點,本身去咗一片空地,但係係好臭垃圾味同埋有光害嘅平地,而且當下極光不明顯,所以我就要求轉地點,佢就建議去比較遠嘅一個湖,我話OK,湖,效果真係好好因為有倒影!(micheal都一樣會去湖)
-佢有幫我地影合照,不過冇michael 咁多,大概之後有send返20張左右,都夠,反正影得幾靚
-你叫佢幫你影相佢一定會影,裝備都好好,尤其是打燈嗰盞燈,優質!有帶埋燈箱。
-我更加多時間自己玩相機創作,佢自己就喺隔離都好興高采烈咁自己行左落水玩
-佢啲朋友有幫我們照顧我父母,我父母有上車休息,佢哋仲幫佢痴暖貼😂到極光爆發就即刻通知佢哋叫佢哋落車
-整體來講都唔錯,不過感覺就業餘d,另外溝通有啲障礙所以感覺冇Michael咁熱烈

價錢:
我比左$3500RUB一人(我有四個人)
琴日問佢拎咗價目表
追光團:
1-3 人- 5000 RUB. per person
4-7 人 - 4500 RUB. per person
10 or more - 4,000 RUB. per person
個人啲價錢都係亂開嘅,即係標準價.....因為佢當初都係同我講4500RUB一人,我問返佢乜唔係3500RUB咩(IG寫),佢就答我係呀3500😂所以有興趣搵佢嘅自己再傾下~佢價錢都係無譜的,你問吓可能又會平啲。然後teriberka($4000RUB) ,Sami village($4000RUB),husky park($5500RUB)活動佢都有做,有興趣自己再同佢傾。
What’s app
+7 911 300-27-20
IG
murmansk _tours


第四間-雪松追光
佢係一個中國人住响當地,你可以WeChat入邊同佢講中文。但係今年佢已經冇自己再帶追光團,佢比左當地司機做(可能即係變咗中介)。
好處及壞處:
-相片質素非常一般,簡單來講我有要求所以不能接受😂如果你對自己技術好有信心或者對相片冇乜大要求就可以搵佢,最後我冇幫襯佢追光,幫襯左佢teriberka day tour
-識中文係佢最大嘅優勢,就算唔係佢接待你,你全程可以WeChat搵佢做交流,無論即時天氣或者其他嘢你都可以搵佢做翻譯
-例如我行李因為航空公司問題遲到,夜晚追光冇腳架用,問佢可以邊度買佢即刻答到你,我有直接同佢講我幫襯第二個追光,佢都冇乜所謂一樣幫你,到我teriberka day tour佢都有幫忙例如約幾點集合啊,司機未到你又可以追佢
-追光價錢平,包車價錢都係平(你去到搵可以更平,明知佢係中介但比較下佢都有優勢,我帶住父母,我想安排左先)
-搵佢來講呢,主要適合唔識英文而且對自己指手劃腳溝通冇乜信心,就可以考慮佢唔使煩
價錢:
$850RMB一細車 (約$8600RUB三人報價,注意不含拍照)
7人車包車 $1450人民幣(不含拍照,拍照另計)
$290RMB一位如果係同其他人拼團(含攝影)
我呢兩日問佢,佢話小車係$900人民幣($9100RUB/3=3033一位),如果係咁坐3人,其實價錢就已經無乜優勢,除非坐爆四人,但又會好迫....仲要唔包影相🤔
WeChat ID:
zhangxuesong208874

Teriberka day tour 我搵佢book就$970人民幣細車,$1200人民幣大車($12135/4=$3044RUB一人,咁比較入邊最平都仲係佢!)

但係機場接送唔好搵佢,因為佢唔係最平😂最後我仲有另外一個女司機介紹,女仔去特別啱用,尤其機場市區接送~


交通安排:特別推介女司機Tanya ⭐️⭐️⭐️⭐️⭐️
佢可能唔係最終極平,但價錢非常合理,為人親切可靠細心。我平時接觸俄羅斯人,一般都係極度冷淡,我識一個俄羅斯嘅機長講笑同我講話:冇人會對你笑㗎..對你笑嗰啲通常都有陰謀嫁😂其實係俄羅斯人比較內斂

我搵到佢其實係因為佢係我酒店幫我安排嘅機場接送,機場到市區單程大車$1400RUB,小車$1000RUB ,佢仲平過上面個中國人雪松。

好處:
-女仔,俾人感覺安心啲
-識英文溝通到,呢個好重要
-好細心
-價錢公道

關於佢嘅我仲想講多件事,由於航空公司問題,我班機降落之後好幾個人行李無到,漏咗喺莫斯科,包括我四個😭tanya係機場外邊等我等左好耐(注意返機場好細,我冇見到有的士,所以盡量都先安排接送),因為我要係入邊做埋啲遺失行李登記,佢入嚟搵到我,積極幫我填埋啲文件(俄文完全睇唔明,全靠佢幫我解決),而我所有厚衣服,鞋,腳架,化妝品都係我個喼入邊,我簡直就係欲哭無淚🤦🏾‍♀️呢個就係我做乜着裙睇極光嘅原因😂

Tanya知道咗佢勁貼心,佢留低左佢電話俾機場嗰個行李部,一路幫我跟進。最最最貼心嘅行為就係佢知道我夜晚要去追光,冇厚衫,佢返咗屋企打包左一大袋衫褲鞋襪頸巾冷帽手套,通通送過嚟我酒店俾我哋用!我簡直感動到哭哭~仲要冇另外收返我車錢。

到最後夜晚我出發左去追光圑,佢就自己揸車去機場幫我接返我啲行李(行李坐咗下一班機),沿途見到有北極光仲即刻影相俾我睇祝我追光成功。然後佢再送返行李去我酒店。本身我諗住佢來回去接個行李應該收兩程車費,誰不知最後都係收我單程。

所以呢個女司機我真係強推!!❤️❤️❤️

除咗機場接送,基本上上面四間有嘅活動都可以搵佢,包括雪地電單車,Sami village,teriberka day tour(5000RUB包午餐),teriberka two day tour(含住宿都係8000RUB),或者各種齋接送佢都有。

Tanya的what’s app
+66829147646

今日分析嚟到呢度,大家可因應個人需求再選擇下要用邊一個啦~下一篇我會再講其他實用資料,等我👋🏻不過可能要等多兩日,呢幾日要返工唔係好得閒寫字✍️

今日幾張相入邊敘述我會註明係邊一個影嘅,等大家方便比較!



Micheal團,中間嗰個就係Michael


出賣阿媽一張,michael 團


Murmansk tour團


Murmansk tour,整體都真係影得唔錯

強烈推薦女司機Tanya!

中國人雪松團,三個字形容,郁鬆矇

雪松圑,唔使打格仔都見到啲人面口唔清晰

雪松圑,面口清楚返,但係啲構圖😅


Nord tour,相片穩陣但係貴



摩爾曼斯克北極光攻略-三大地點對比分析

摩爾曼斯克北極光攻略-三大地點對比分析

估唔到俄羅斯北極光咁反應踴躍,多謝大家收睇我嘅文章!今日係一篇資料性比較重的文,可能會覺得好悶。因為我平時好鍾意做旅遊攻略,唔想浪費左啲資料,所以我寫啲嘢好資料性,大家千祈唔好誤會係廣告。再續俄羅斯北極光,昨日輕輕講過,摩爾曼斯克有三個地方可以睇到北極光,位置唔同方式都唔同,我今日就喺度分析一下各種利弊~

先講下有邊三種方法:
1)teriberka 入住海邊小屋或hostel,就喺自己門外面守候睇
2)極光基地lovozero 入住小木屋,都係喺自己門口睇,或者基地附近範圍睇
3)住喺摩爾曼斯克市中心,參加追光tour,由有經驗嘅當地極光獵人(攝影師)由市區一路開車,到不同地點追光


我自己就選擇左方法三,因為我逗留日子只有兩晚,一同埋二選擇就位置距離機場好遠,我去就會好頻撲。而且父母怕凍,不適合喺室外長時間等,跟住追光獵人我父母凍嘅時候可以即刻上車吹暖氣同埋飲熱茶,無咁消耗體力。

分析一下Teriberka追光利弊
簡介:teriberka 係一個冰洋海邊嘅小漁村,本身可看性好高,睇風景嗰隻。從Murmansk 一路過來有好多小景點,就算唔住喺度都一定要來一日遊。

距離:摩爾曼斯克市區去teriberka 大約兩個半小時車程

交通:minibus班次唔多不過平去程星期一三五日有車,回程二四文早上有車 (唔推介,啲時間太任性)/包車(比較推介)

好處:
海邊風景本來就好靚,有瀑布沙灘海邊湖泊,仲有船舶嘅墓地相當有特色,自然純樸。追光就喺自己屋仔門口就可以睇極光,唔使周圍走。

壞處:
-冬天去teriberka 會有大雪封路嘅危險,可以嘅話唔好將佢擺喺行程嘅最後一兩日,費事錯失左飛機。
-住定一個地方,只能喺佢外邊等,冇得移動。若果雲多或者落雪就睇唔到北極光,你冇得走,要等雲霧散去實在唔簡單,可能成晚都等唔到,需要運氣比較大,有等幾晚都可能失敗嘅風險。
-住宿選擇好少

分析一下極光基地lovozero
介紹:薩米人傳統村莊,據說聖誕老人就係薩米人。因為北極光出現嘅頻率比較多,成為出名嘅極光基地,住宿大部份都係家庭式經營,村內交通就係雪上電單車。

距離:摩爾曼斯克去lovozero車程大約四個鐘

交通:從Murmansk 包車前往lovozero,然後需要再轉乘雪地電單車到基地

推介住宿小屋:
Country house lovozero/lovozerotur/Touristic Center Yulinskaya Salma/northern pearl (呢間正,有自己嘅husky雪橇狗公園)呢幾間,可以由基地安排各種活動,如俄羅斯桑拿,雪地電單車,冰釣。本上全部基地活動都一樣。

好處:
-基地提供嘅活動有好多
-住宿好有特色,氣氛特別好,特別與世隔絕。不過住宿條件都係一般唔好期望太多,絕對唔係豪華嗰一種
-行出門口就可以睇到北極光
-少光害,位置合適,容易睇到

壞處:
-同teriberka 一樣,住定一個地方,只能喺佢外邊附近範圍等,冇得移動。若果雲多或者落雪就睇唔到北極光,只能坐以待斃
-遠,車程四個鐘仲要再轉雪上電單車,需要浪費不少時間喺交通上
-北極圈區域性氣候好強烈,例如某個郊區落雪一落可能就幾日,但係其他地方可能天晴
-電話訊號收得唔好

最後一種方式-住Murmansk 市區,參加追光團
距離同介紹都唔使講,直接講係有咩好處同壞處。
好處:
-近,直接由市區出發,如果你坐夜機八點前到,直頭可以一落機直接安排機場接機出發,行李放喺車尾,馬上去追光!
-價錢合理,平均一人收費大約港幣$400左右,包車費,八點幾出發,玩到一點幾,係我自己話玩夠我要返去先離開😂攝影師司機(由於我對攝影好有要求,所以我搵過四個唔同嘅攝影師,我可以詳細再品評一下,價錢有唔同,技術都好唔同),重點就係佢會幫你影好多好多相,你同北極光嘅合照,佢之後會email send翻晒俾你,好有紀念價值!你可以專心睇極光,唔使掛住自己喺度玩相機,都唔使擔心影唔到。
-移動性大,舉一個例子,我第一晚極光指數好高,但雲量多,我個司機就一路帶住我,轉換左三四個唔同地點,一路望住個天,睇吓邊度無雲,就即刻揸車移動走,唔浪費時間留喺原地等待
-適合逗留時間唔長嘅人,你留兩三晚,呢個方式就幾適合
-市區有各種檔次類型酒店可以選擇,餐廳亦都好多,如果你住郊區,食物就靠晒間酒店
-凍或者暫時冇光你可以即刻上車休息,有飲品同埋小食
-可以留下一對有質素嘅相片(呢個對我來講最鍾意)

壞處:
-市區光害大,除非北極光好活躍,否則你行出門口唔會睇到,必須要參加tour或包車
-市區冇乜嘢好玩,只有一兩個景點,如果想玩嗰啲冬季活動如睇麋鹿,狗拉雪橇等等,需要再另外參加~不過都係好容易解決嘅。日頭參加一個活動,夜晚再參加極光團,絕對可行!

分析就黎到呢度先~三個地方各有好處,冇話邊個特別好邊個特別唔好,真係要自己選擇邊樣適合你。或者你可以選擇留兩個地方,咁樣見到北極光嘅機會率就比較高啲,又可以有兩種唔同體驗!

由於再講就太長驚大家消化唔到,同埋打一大篇字我都要打好耐。為免造成混亂,有關於包車,同埋追光tour比較幾個唔同人嘅contact,我想下一篇講,因為各有利弊,(例如唔識唔識英文,攝影技術如何)。再之後會再講需要用到嘅Apps,裝備,餐廳,交通,攝影,睇極光你必須要知嘅事情,行程編排建議等介紹,下回再分解,等我👋🏻








北極光指數KP4

Lovozero 極光基地(因為我無去呢度住呢張係網上圖片,係咪好吸引呢)

Teriberka 北冰洋海邊小漁村,附近好多風景漂亮嘅地方,秋天時候嘅景色。冬天都好靚㗎






紅點係摩爾曼斯克,黃點係lovozero,藍點係teriberka ,可以參考一下佢個位置。(注意返,北極光唔代表越北越睇到,反正喺嗰個極光圈入面,都可以睇到,冇乜大分別的)

幾千蚊睇極光不是夢!追光新熱點-俄羅斯摩爾曼斯克

幾千蚊睇極光不是夢!追光新熱點-俄羅斯摩爾曼斯克

近呢三幾年好流行睇北極光,我都好鍾意!一般睇北極光都係去芬蘭inari/瑞典abisko/挪威tromso/冰島/加拿大黃刀或者阿拉斯加,以上所述,睇個名都覺得實在有啲貴~~

到咗今年我發現原來俄羅斯都可以睇到北極光架(恕我孤陋寡聞)!重點係價錢平,我一直都好想帶我父母去睇北極光,但係美加實在太遠父母受唔住啲長途機,而北歐就太貴,我一個人負責三個人嘅支出我會好吃力🤦🏾‍♀️所以當我發現左呢個地方,簡直尤如哥倫布發現新大陸咁興奮,即刻打電話俾阿爸阿媽叫佢哋請假去睇極光(今年10月)!

摩爾曼斯克Murmansk ,係咪好多人都冇聽過呢個名呢?原來係呢三兩年先興起嘅地點,佢響俄羅斯西北部,係北極圈入邊最大嘅城市,有一個不凍港。遊客都未係好多架~而佢最大嘅好處就係近!平!位置方便容易去!

詳細講下有咩好處😆

飛行時間短:俄羅斯航空有直飛莫斯科,機程大約10個鐘,你可以考慮玩幾日莫斯科先,然之後由莫斯科轉機去摩爾曼斯克就機程只係兩個半鐘,我前排見過佢做特價,成套機票來回連稅$4577。然後俄羅斯時差仲要比美加少,又唔使捱長途機~雖然北歐機票價錢差不多,但係消費水平一定唔會好似呢度咁平!

價錢低:摩爾曼斯克消費物價相對北歐平好多,同香港咁上下,住宿一般來講都係幾百蚊雙人房(我住300左右港幣三人房),而機票又平啲呢!如果大約玩一個星期左右,(極光團$400左右)活動連食宿5000夠了,所以加埋機票一萬有找綽綽有餘~呢個係去北歐或者美加做唔到嘅價錢!

活動:市區冇乜特別得一隻破冰船可以睇,但周邊嘅北冰洋小鎮teriberka你可以住喺嗰邊又或者一日遊,有其他例如民族村,狗拉雪橇等等冬季活動,都係同其他睇極光嘅城市差不多,大同小異。

睇極光方式多:唔一定要去車程好遠嘅郊區,方法有三個1)local包車追光團 2)住極光基地小木屋 3)住teriberka 冰洋邊嘅小屋 (之後會再詳述)

交通:包車好方便而且唔貴,雖然好多人唔識英文,但係唔重要,自由行冇難度,完全唔使跟團喇~城市嘅移動就用app call車,又唔貴又容易操作!

食:海鮮出名平同埋新鮮!摩爾曼斯克城市入面有好多餐廳,我揀咗一間比較高級嘅,入面裝修都幾靚,人均都係食咗百幾蚊。基本上都係食海鮮~~食得好爽㗎

日子:每年九月至到四月都可以有機會睇到北極光(10-3機會率會好啲,我鍾意秋天去因為唔凍)

我就連續三年都有去追北極光,2016冰島,2017 阿拉斯加,2018摩爾曼斯克。加埋加埋都成功睇咗十幾日,所以對追光略為有有少少研究,大概知道點樣會睇到,要準備啲咩裝備等等.

.
之後呢幾日會繼續再講下俄羅斯追光攻略~包括攝影,追光方式比較,裝備,住宿,餐廳,其他活動,包車等等~~~~務求大家同我一樣,唔使俾中介賺錢可以自己慳錢去追光!


唔寫咁多住,我又長篇大論,太長好難睇,未完再續👋🏻有興趣嘅留言話俾我知你想知啲乜先啦



極光指數5嘅晚上

大爆發,唔止見到綠色,仲有紫色

第二晚,湖上極光,指數4

紅點俄羅斯摩爾曼斯克,黃點芬蘭inari,藍點挪威tromso,畫漏左瑞典😂

2018年12月23日 星期日

胡志明市性價比高法國菜餐廳-3G trois gourmand🇫🇷

胡志明市性價比高法國菜餐廳-3G trois gourmand🇫🇷

越南以前係法國殖民地,所以有好多優質嘅法國菜餐廳~

早兩日忽然間俾公司改咗飛胡志明市,我就即刻上網做功課,搵左呢間食法國菜嘅餐廳,Book咗位同幾個同事一齊去食午餐。

我哋中午12點左右去到,得幾台客(聞說夜晚比較火爆),餐廳環境都唔錯,未至於好豪華,好似小別墅咁,外邊有個小花園同埋泳池~

呢間餐廳午餐同晚餐嘅價錢冇分別(其他一般都係午餐平啲),5 courses折合港幣大約$350,6 courses $387,7 courses $425。法國菜來說都算係相當抵食!

我點左個6 courses menu,首先先來咗個黑松露炒蛋,同埋麵包,黑松露超香!之後自選兩款頭盤我就揀咗煎鵝肝+黑松露煎帶子,兩樣都超好食😋仲要份量都唔少

食完頭盤好貼心咁會有一個檸檬雪芭俾你清一清味蕾~

之後就去到主菜,可以係肉類或者海鮮揀一樣,選擇有好多有幾十款,樣樣都好想食,到最後我揀咗龍蝦🦞雖然唔係好大隻但肉質鮮嫩,美味呀!

再之後就係芝士盤,有好多種唔同嘅芝士口味,例如洋蔥黑松露橄欖等等...我個人來講就唔係好識食芝士,所以淨係食咗少少,黑松露嗰隻都幾香..

最後就係甜品,好鬼多選擇啊!我啲同事揀咗macaroons,朱古力心太軟,煮梨,而我就揀咗開心果味焦糖布甸creme brûlée ,有配埋雪糕~

整體來講好滿意!價錢又唔貴,可以享受下小奢華嘅法國菜~~唔錯唔錯下次去胡志明市再試第二間先!



地址:

3G trois gourmand
39 Trần Ngọc Diện, Thảo Điền, Quận 2, Hồ Chí Minh, 越南

訂位官網:
3gourmandsaigon.com.vn

交通:

建議用app ‘grab’叫車,咁就唔使驚俾的士呃錢


























2018年12月18日 星期二

峇里島Bali Swing網紅打卡叢林鞦韆🌴

峇里島Bali Swing網紅打卡叢林鞦韆🌴

Bali swing叢林鞦韆照片在instagram 上爆紅,我想去好久了,不過好像一年都沒飛過峇里所以一直沒有機會,早兩天終於有機會去了!本來打算自己一個去的,因為這班機好像沒有相熟的同事。所以我出發前一天先訂了包車和門票,到了上班時剛好有另一位同事有興趣去,馬上上淘寶再多訂一張門票,而包車車費就可以一起share了~

我是在淘寶上訂的門票及包車〜6小時七座位專車+網紅鞦韆門票含午餐,費用很便宜,門票$184一位,包車$210一台可以坐五個人。我兩個人去,所以合共平均$288港幣一位。

Bali Swing位於烏布,距離kuta 市區約1.5小時。你可以選擇包車一整天(也貴不了多少),再去多一兩個景點例如海神廟,聖泉寺,皇宮集市,梯田,瀑布(附近有個很漂亮的)或是去參加漂流或滑翔傘活動。由於我只短暫停留一天,時間沒有很多,所以我就只去了Bali swing。建議大家如果同一天要去兩三個景點,行程的第一個就先去鞦韆因為晚去了會比較多人排隊,我們9點司機在酒店大堂接,去到大概10點半,先去排人最多的鞦韆就排了差不多半個小時。可能不是旺季排隊時間還是可以接受的。

整個園區不大,場內有十幾個鞦韆,高度及景致不一,最受歡迎的有兩個需要排隊,其他基本上都不需要怎麼排。一般拍出大片的都是中等高度的。因為最高一個鞦韆會有很多安全帶綁在身上,拍出來衣服就不好看了。

Baliswing除了有鞦韆,還有各形狀的鳥巢,岩石,都是可以用來拍照的。所有項目都可以無限次不限時地玩,安全方面也是可以的,每一個鞦韆和鳥巢都有安全帶,絕對不會掉下山去。

另外,門票的價錢還包含了自助午餐,茶咖啡水免費,汽水需要另外收費。食物是峇里菜,味道還不錯!

現場還有專業單反拍照需要10美金。這個地方真的很有名,充斥各國遊客,如果你想要打卡,來一趟還是可以的,如果你想來靜靜的看一下風景,那就可能不合適〜

小提示:如果想要拍出漂亮的照片,穿的衣服也很重要,最好是純色,或者飄逸的長裙,外套,能拍出被風吹起的飄逸感。長裙來說要選有開叉的,要不然尾巴飄不起來效果也不夠好~

交通:
建議包車,不建議用的士或grab因為難找回頭車

地址:
Jl. Dewi Saraswati No.7, Bongkasa Pertiwi, Abiansemal, Kabupaten Badung, Bali 80352印尼

門票:
門口買$35美金,淘寶平好多,可以倒貼十幾美金剛好用來付車費













2014年5月30日 星期五

29/12/2013 day2 大阪黑門市場-奈良公園看麋鹿-志津香釜飯-奈良商店街中谷堂麻糬-京都河原町本格燒肉

29/12/2013 day2 大阪黑門市場-奈良鹿公園-京都

是日行程:大阪-黑門市場-奈良志津香釜飯-奈良公園看鹿-氷室神社-奈良商店街中谷堂麻糬-京都河原町-本格燒肉 (宿京都:kyoto rich hotel)



2014年5月27日 星期二

28/12/2013 day1 大阪心齋橋+道頓崛大阪王將煎餃子-本家燒章魚丸-鶴橋風月大阪燒

128/12/2013day1 大阪心齋橋


是日行程:大阪行街食食物,心齋橋購物逛GU,藥妝店-道頓崛食野-大阪王將煎餃子-本家燒章魚丸-鶴橋風月大阪燒 (宿大阪新今宮站附近的sunplaza 2)



是日乘坐Hong Kong express 廉航早上九點半的班機前往大阪關西國際機場,到達時間大約下午兩點。入境及取行李手續都很快捷。