2019年1月11日 星期五

一般人非專業攝影師都可以影到北極光!北極光拍攝小貼士

一般人非專業攝影師都可以影到北極光!北極光拍攝小貼士📸



器材裝備:
1)腳架 (普通三腳架就得,我果支都係鴨寮街百幾蚊貨色)
2)有手動功能的相機一部,唔一定要係單反架!
(能夠手動調校光圈快門iso ,m mode)
3)保暖裝備(個人要保暖,相機都要保暖,因為天氣凍佢好快就會冇電,溫度太低時可以幫佢笠個膠袋,貼個暖貼)
4)電筒一個(唔建議用電話因為你電話會好快無電,太凍iphone 亦會暈低)
5)以廣角鏡為佳,愈wide就影到愈多(我用10-24mm),光圈愈大愈好
6)備用電池(寒冷低溫下電池耗電超快,玩一陣就無電)

出發前先要熟悉自己部相機,d制點㩒,因為有時極光爆發只係一瞬間,而且當下環境黑,唔熟d制就會搞好耐都未影到,所以可以在香港練習下影星空先~方法大致上一樣~

相機設定:
-關閉防手震
-關閉降噪功能
-如果冇快門線,就設定倒數幾秒後先再拍攝,以免撳掣嗰下郁到而令相片變得模糊
-用手動mode(M mode)進行拍攝
-感光度iso800(IS0800-IS03200,視乎相機同埋極光活躍程度,我自己果部機就1600係極限,我通常都係iso800)
-快門設定:視乎當時極光明顯程度而設定(5-30秒)越活躍就越短時間都得,kp5嗰日大概都係5至10秒一張,但kp2要25-30秒先可以影得明顯綠光
-光圈設定:最大光圈
-對焦:要使用手動對焦,先將鏡頭調成無限遠(infinity),再手動操作慢慢扭回少少焦距,每次1mm,多次嘗試,直至放大睇畫面清晰為止(呢個重要!記得放大睇係清晰先!)

簡易人像極光合照補光技術:
-按下快門等候倒數之後開始拍照,無論快門速度係5-30秒,人要企定未影完之前都唔可以行開。然後用電筒照一下個人(1秒左右)就熄燈,繼續企定等待餘下嘅快門時間直至影完一張。咁個人就會光~~睇一睇效果,如果個人過度曝光(爆左)就照電筒嗰下再短啲時間,如果個人太黑就照耐多少少。有時影30秒定格會好攰😂最重要就係照電筒個秒千祈唔好郁,唔照住嗰陣小小郁都仲可以接受嘅。

注意事項:
-運氣好遇上極光爆發,光移動速度較快,就需要縮短快門速度,減iso 。
-拍攝背景及道具:無背景淨影天無咁好睇,所以一般極光前景可以影d森林、帳篷、湖、馬路、車、屋等等。湖有倒影都係一個好好嘅選擇!
-避開光源,盡量減低光害。
-可以手持小電筒或者LED道具燈,效果唔錯
-避免拍照途中將相機拎入室內,一冷一熱鏡頭會起霧,有排都唔散

後製:
-後製執相都好重要,可以用iPhone內置相片編輯,提高光暗亮度及顔色,極光效果即刻明顯好多~
整體來講其實影出嚟嘅效果一定會比你親眼目睹嘅好~~~因為相機可以拉長曝光時間!都唔好太執着影唔影到,尤其大爆發一刻,最緊要自己用眼睇左先!影唔影到都係其次,享受當下,睇咗入咗自己腦先最重要😆

俄羅斯北極光都講咗好多篇了,差不多去到尾聲~👍🏼下個主題我想講下冰島




Iso 1600,25秒,f4,10mm,個人就25秒中間照完一次,再行去對面再照多次。就可以做到兩個人嘅效果


照夠4次效果
電筒除咗可以用來打光個人,都可以用來做道具

倒影真係靚。setting 10mm,20秒,1600iso,f4







俄羅斯摩爾曼斯克衣食住行及其他實用資訊


俄羅斯摩爾曼斯克衣食住行及其他實用資訊



今日post得有d晏,因為啱啱先收工由上海返到屋企,今日就講下摩爾曼斯克嘅衣食住行,電話卡,語言兌換等等~~又要大家俾啲眼力睇喇~~~唔鍾意睇嘅朋友都忍耐下,下一篇再講埋極光拍攝小貼士就差唔多講晒啦😝到時就再講新主題~好啦我哋開始今日嘅主題!

衣
香港人好少接觸咁凍嘅天氣,我哋要洋蔥式着法,避免凍親~
落雪時可以咁着:
上衣:heattech兩件+有毛嗰啲打底衫一件+冷衫或者衛衣面衫+抓絨外套+防風防水外套/羽絨
下半身:淘寶買嘅打底襪褲,一條終極厚,一條一般厚,平時去零下十幾20度嘅地方都係靠佢哋,着一條就夠晒!(有幾種唔同厚度,一種適合-10,另外有一種終極厚舊年去阿拉斯加-30都一條搞得掂),如果九月10月去嘅話普通一條牛仔褲都搞得點,不用專登買好多裝備~男仔嘅話就著條嗰啲俗稱「虧佬褲」響入邊就得
如果一二月去,最好準備多一條防水嘅褲,如戶外褲或滑雪褲咁樣

鞋:落雪千祈唔好着UGG滑到死架~要著防滑底嘅雪地靴,又或者加一個廿幾蚊淘寶冰爪。如果10月九月去,鞋都唔使咁講究,是但着波鞋都得。衣服唔使帶咁多,冬天唔出汗,裏層基本上都唔會點替換,外套又重又厚又唔會帶多,所以帶多兩條頸巾叫做每日變換款式好過
頸巾+冷帽(遮到耳仔嘅)+手套(如果落雪最好就用戶外專用防水嗰啲)+羊毛襪(如果-15以下要着兩對)+帶定一堆暖貼以備不時之需(自用/相機用/電話用)+保溫杯(可以隨時隨地飲熱水)
九月10月去係唔使着咁多衫,我只着咗兩件heat tech+冷衫+普通外套+仲要着裙+略為厚打底襪褲,係咁多

食
Murmansk 都出名食海鮮,我嗰日喺teriberka 有個人賣左隻巨大皇帝蟹比我(超大隻三百幾蚊),仲有扇貝青口同埋海膽,仲即場俾我哋試食!扇貝超鮮甜,計返港紙大約$60蚊一公斤,我哋買咗好多返酒店自己煮嚟食~食海產早餐😂
有幾間嘅餐廳唔錯:
獵人餐廳restaurant tzarskaya okhota
最熱門嘅一間餐廳,距離市區比較遠。據說老闆好鍾意打獵,裏面就好似一個獵物展覽館。食物質素都唔錯有肉有海鮮,擺盤好靚,人均消費大約$100多啲。
Tundra
人均消費都係百幾蚊,餐廳睇落都好高級。食物質素好,各種肉類海鮮都有。有皇帝蟹有扇貝等,味道幾好,menu有圖片點餐好方便!
Terrasa lounge cafe
都係食海鮮為主,個海鮮拼盤好食。近市區。一樣都有皇帝蟹食!人均都係100多少少。擺盤超靚~餐廳環境都幾好

住
Murmansk 市區可以考慮住:
Mini hotel tri zaytda
三人房都係$239!我就係住呢間,外面睇完全唔知係酒店,佢類似民宿咁樣,一間屋入邊有幾間房,房間乾淨企理,共用兩個廁所,不過廁所就係你房門口咪同屋企差唔多。有廚房可以使用,我哋買咗啲海鮮返嚟自己煮!正!慳錢之選,同埋行路就可以去到列寧號,好近!
Azimut hotel Murmansk
$547雙人房,呢間酒店最受歡迎,最大最正規嘅酒店,唔係特別想慳錢嘅可以考慮,位置好方便對面就係車站同埋麥當勞
仲有好多apartment都係$300以下,自己上酒店網睇下啦~

行
Uber只在莫斯科通行,摩爾曼斯克市區移動,可以用電話app “Yandex.Taxi “ call車,使用方法同uber一樣,好處就係不用線上俾錢可以直接到時上車比現金
包車就可以搵返我上一篇提及嘅女司機Tanya

語言
俄文,絕大部份人唔識英文,所以雞同鴨講,但無問題嘅,指手畫腳+google translate 可以幫到你。一定要download google translate app去電話度。

兌換
香港重慶大廈或者其他找換店有俄羅斯盧市可以兌換,亦可到達莫斯科機場之後直接ATM提款(記得早一天先在香港的櫃員機開通海外提款功能!),又或者去到機場的找換店兌換。
消費來說,餐廳可以碌卡,但係我嗰啲追光團都係比現金,消費指數唔算高同香港差唔多,一定平過其他歐洲地區

自駕
雖然平時我好鍾意自駕遊,但係追極光好浪費體力長時間等待會攰好眼瞓,而且包車都好平,何必自己辛苦呢?然後冬天雪地路況複雜,冇雪地駕駛經驗好易出事,所以我唔建議

天氣溫度
基本上能追光月份都會多雲,當然唔代表日日都多雲啦。溫度上就唔算好低,因為關於啲海洋對流嘅問題,佢有全年嘅不凍港,所以好少會去到-30度,一般都係負十幾,都仲頂得住。而9月10月就最暖追光嘅月份,日間有幾度,夜晚-1左右。最寒冷就係一月。

電話卡
俄羅斯電話卡10天7GB 4G,$80港幣,鴨寮街有售,整體來講周圍都收得幾好。不過荒山野嶺嗰啲就唔好講啦~反正夠你用,市區call車查資料完全冇問題

幾個實用電話app:
“Aurora Fcst”+”my aurora forecast “,兩個都好有參考價值,可以即時睇到嗰個位置個指數係幾多
“Google translate “,即時翻譯,講唔通就可以用
“Google map”呢個唔使講啦,世界通行地圖,市區入邊行走靠曬佢
“Yandex.Taxi “市區搭車靠晒佢

今日又講住咁多先,都差唔多講到尾聲,下一篇再講極光拍攝技巧分享~





$80鴨寮街電話卡

必須要安裝的call車apps


非常實用嘅北極光預測app

一樣都咁好用嘅極光預測



送多張即開即食海膽


摩爾曼斯克海鮮比較著名~~計返港幣三百幾蚊嘅巨大皇帝蟹(路邊漁夫賣的)


即開即食扇貝!



早餐😂

手掌咁大隻青口

Tundra餐廳的食物





俄羅斯摩爾曼斯克北極光攻略-購買機票及行程篇✈️

今日玩空姐教你買機票😂其實通常空姐都唔係好識買,因為好多時都唔需要買,所以通常呢啲標題都係呃like用😅我算係比較例外,好啦唔講廢話,講正題!



要踏出去俄羅斯睇北極光嘅第一步,當然係買機票,我驚大家心急依家落手洗咗冤枉錢,所以我要快啲講下買機票應該要注意嘅地方~呢篇更加學術性,想去嘅朋友要俾啲眼力睇吓!未買嘅就可以出手喇,如果成套機票$4000真係買得過!(我覺得我呢篇介紹勁似sell機票嗰啲小編囉😂可惜我唔係,純粹想協大家慳到錢)

機票點搞呢?!

香港去摩爾曼斯克最方便方法為去莫斯科轉機。香港有飛機直接由香港去到莫斯科(SVO),機程10個鐘。莫斯科內陸機去摩爾曼斯克(MMK)兩個半鐘。記得留意番轉機時間最少預留三個鐘,因為嗰邊機場好大,custom過境嗰啲都好耐
去程:HKG-SVO-MMK
回程:MMK-SVO-MMK
一般都係坐俄羅斯航空,呢個方法係最直接最慳錢最慳時間嘅坐法。

建議機票購買方法(重要⭐️⭐️⭐️⭐️⭐️)
正常人懶惰,一定係search香港去Murmansk 一整套咁買,但係我啱啱做咗個測試,有個驚人發現!!假設3-9/3去一星期,聯程買係最平$4571時間仲要勁爛,凌晨先到mmk,返來仲要中轉10幾個鐘莫斯科!


而將佢拆分開兩段買會平左五百幾港幣,香港莫斯科來回$3150+莫斯科摩爾曼斯克來回$903,同一張飛同一班機合共只即係$4053連稅!差好多呀,反正都係坐同一班機佔一個位,咪比哋呃錢😂咁樣買仲平過之前skyscanner 同flyday post出嚟嗰個offer呀!


我強烈建議你拆散兩套買,即係先買香港莫斯科來回(HKG<->SVO往返)而內陸機票(SVO<->MMK往返)你可以臨出發之前兩星期到幾日先買。內陸機票價錢好穩定,一日有好多班次,尤如搭巴士所以唔急住買㗎!


除咗可以平啲咁做最大嘅好處就係!!你可以等到15日個KP指數出咗,而且你又可以睇到天氣預報見到會唔會落雪,天清唔清先再決定你嘅旅程邊幾日去追光,邊幾日留喺莫斯科或者聖彼得堡玩~咁你個行程可調動就會彈性啲,同埋睇到北極光嘅機會率亦大大增加!酒店嗰啲就唔驚㗎,你住市區大把選擇,即日book都仲有~

我之前內陸回程返莫斯科張機票,我係起飛前10個鐘先買(呢個唔好學,太遲貴左$400)😂酒店都係早三日book,不過酒店如果你要住基地,咁就要早啲book喇!

機票參考價錢:
-香港莫斯科來回連稅$3100-$3600港幣左右我覺得買得過同合理(建議早半年到兩個月前好買,但係唔使早一年,太早反而有貴啲,我睇咗而家買10月都OK,都係3300左右)
-莫斯科來回摩爾曼斯克機票大約$800-1200港幣,可以買單程,價錢就一半咁樣啦。如果要去埋聖彼得堡就買單程都得,聖彼得堡都有飛摩爾曼斯克,機票價格都係幾百蚊

有關行程建議
建議停留摩爾曼斯克日數:3-6天
最好逗留三晚或以上,增加追光成功機率
假設你個假期有7日(即係頭尾冇左兩日,實玩5日):
建議兩日莫斯科+三日摩爾曼斯克
去8日就建議:
兩日莫斯科+四日摩爾曼斯克
9日就建議:
三日莫斯科+四日摩爾曼斯克/兩日莫斯科+五日摩爾曼斯克
10日就建議:
兩日莫斯科+兩/三日聖彼得堡+三/四日摩爾曼斯克
再多假啲就隨你點玩啦😂

莫斯科兩點玩呢?
Day1 紅場+克里姆林宮+阿爾巴特街
Day2 一隻螞蟻市場+木造宮殿

摩爾曼斯克仲有咩玩?
除咗睇嘅北極光,頭仲有其他活動嘅~
市區一日:列寧號破冰船+世界上最北麥當勞打卡+阿廖沙雕像
Teriberka :可以包車一日遊,沿途經過好多湖泊,仲有擱淺左嘅船,北冰洋,海灘,石陣,瀑布等等,沿途景色都好靚,值得去一日又或者兩日一夜住喺嗰度一晚(嗰度光害少,都有機會睇到極光)
其他活動半天:薩米村/狗拉雪橇/麋鹿公園/雪上電單車

好啦,真係驚大家睇到悶,今日又講住咁多先。明天再續摩爾曼斯克衣食住行及其他雜項攻略,等我









俄羅斯摩爾曼斯克北極光攻略⭐️邊個月份去好+極光小知識

俄羅斯摩爾曼斯克北極光攻略⭐️邊個月份去好+極光小知識



今日照舊長篇大論,無辦法大家山長水遠去睇,無非都係想睇到!冇理由空手而回架嘛,煲下攻略知多少少,絕對對你有幫助😝

幾時出發好呢?我發現呢個問題最多人問,所以我要優先解答!

呢個月份分析我之前都做咗好多功課,包括睇咗好多個月天氣預報,雲層分布圖,降雨降雪表,日照時間及個人經驗等得出來的結論。

睇北極光,KP index指數並唔係最重要,呢個只係反映極光強弱表現,最重要嘅係天氣!係要無雲,天晴!無落雪!

摩爾曼斯克北極光9月中就開始出現,到月尾就開始頻密~一路直至三月尾四月初其實晚晚都有北極光,爭在強唔強。而好唔好天,就會影響你睇唔睇到~首先先避開光害,即係城市嘅燈光,如果天晴,即係舉頭能夠望見星星,咁就恭喜晒基本上你100%睇到!由於係冬季,每一個月都有多雲日子,不過就算有雲,都唔一定見唔到,睇吓厚唔厚,又或者附近某啲區域可能會冇咁厚雲,適當嘅移動都令你可能會追到~

9月底到10月:
最暖!真係唔好以為天氣凍先睇到北極光,其實秋季嘅北極光一樣咁精彩!而且秋季未開始落雪,雖然10月都有不少多雲日子,但整體睇到嘅機會率都唔錯㗎!我就係10月中去的,大成功~而且日照時間長,八點鐘左右天光五點鐘左右天黑,日長大概9小時,我以日頭有足夠時間玩其活動~玩完去食飯,食飽就可以出去追光!長輩嘅話尤其推介,因為九月底到10月溫度都唔係好低,日間有幾度,夜晚都只係零下一度!呢個都係我主要呢個月去嘅原因,我帶着父母唔想佢哋凍親!適合長輩怕凍人仕!我個人來講就唔算怕凍,但係我領略過阿拉斯加-30度之後,我明白-30係超辛苦,喺戶外根本頂唔到超過20分鐘🤦🏾‍♀️

11月:
唔好嘅月份❌因為開始進入冬季,勁落雪起雲風雨雪交加果一種~而且日照時間開始減短,11月中,10點天光,下午三點天黑,大概只有五個小時日照,雖然都唔算好差,但你日頭嘅活動就大大減短。

12月:
我絕對唔會考慮嘅月份❌最黑嘅月份。12月雲量好大,多雲天氣機會率係82-86%。但由於佢係北極圈緯道好高嘅地方,十二月份佢進入左持續40日嘅永夜!你冇睇錯係永夜,即係太陽永遠都唔會高過水平線~雖然未至於全黑,每日大概12點至到三點會有光,基本上唔係好會見過太陽...咁樣嘅天色人都覺得好灰暗,會好影響你玩日間活動。要見到北極光,需要更加大嘅運氣

1月:
永夜嘅情況持續到1月10號左右。如1月25號早上11點天光,下午三點天黑,已經有返四個幾鐘頭太陽。都開始好d喇~如真係要一月去,咁就月尾好過月頭。全年最凍就係一月,最嚴重可以零下30度(好少),因為嗰啲大西洋對流影響,反正Murmansk 一來講都唔會太凍~睇佢有個不凍港就知啦

2月:
比較推薦嘅月份✅,天氣寒冷及晴朗日子比較多。例如1號10:19天光,15:44天黑,25號08:30天光,17:33天黑。日照時間已經去返合理嘅水平,極光就都OK~當然都係果句睇彩數啦,要睇吓落唔落雪

3月
比較推薦嘅月份✅溫度-2到-9度。開始回暖落雪嘅日子又會比較少,我往年都係選擇三月出發追光架~不過由於天氣回暖有機會會起雲起霧,但雲量比一,二月已經有更減少嘅跡象。

總結嚟講,係天氣,溫度,日照第考慮下,我個人就會選擇9月尾到10月,或者二月中尾到三月中呢兩段日子~而11,12,1月我自己就唔會考慮。當然都係果句,揀啱日子只會增加你睇到嘅機率,始終呢啲係自然現象,係天意,人類係無法左右的😵(等我帶返個頭盔先👩‍🚒)

始終嗰啲月份都有機會會有雲會唔好天。不過經過我做功課之後,我暫時三次追光trip都好成功,雖然有某啲晚上係會睇唔到,但冇一個trip係徹底失敗。而有好幾個朋友曾經去過芬蘭12月及1月都有,留5晚,落大雪,一d都睇唔到。所以呢個亦都係我唔選擇呢啲月份嘅原因。

今日下半部份講一講:北極光小知識!呢個知識無論你去邊度睇極光都啱用

極光係高緯度嘅天空中,帶電粒子同原子碰撞造成的發光現象。所以身處「極光帶」由9月底到4月都有機會睇到。

極光指數:
又叫KP index,分為0-9級,0,1同9基本上唔會有嘅~
KP2 -肉眼睇一片灰灰似雲咁,極光不會舞動唔會郁,超認真睇可能會見到小小嘅綠色。用相機長曝光先影到明顯綠色
KP3 眼睇已經係綠色,不過不太活躍,不太會舞動,但係相機長曝光會影到超級明顯。亦有短暫嘅時間有機會舞動~
KP4 已經好好,綠色好清楚,有時會有短爆發會有紅同紫色~影出嚟效果已經超好
KP5-8 超好運!好似維港燈光匯演咁,好活躍係咁郁,市區有光害地區都會睇到,真係恭喜晒你呀!我記得冰島試過KP7然後全市公投當晚熄燈,全城期待極光爆發,不過最後效果好似未如理想😂所以話指數只能參考,天意嘅嘢邊有得講架😛


仲想提一提!其實極光好少會成晚瘋狂舞動足好耐,一般超活躍大爆發狀態可能只last 幾分鐘!之後就會回歸平靜d..所以要睇要影就要快~我第一次睇嘅時候,仲以為佢成晚都係咁添,少年太無知了😂(或者kp7可以舞足一晚?!唔知呢😆)

我幾次追光,最高都係遇上kp5,其實kp3-4已經相當唔錯~

邊度參考KP index👇🏼呢個網站,你㩒返入Europe 就得,有未來15日嘅預測,建議你去之前日日睇:
https://www.gi.alaska.edu/monitors/aurora-forecast


由於太多資訊,唔適合一篇講晒,大家就稍為消化下先~我已經準備好下一篇係講有關於買機票及行程攻略,大家唔好急住買左機票呀,下篇重要啊!睇埋聽日先呀😝聽日見




Kp5+多雲,唔算好厚☁️,你可以見到極光係雲都遮擋唔住


紅點係Murmansk ,我當日kp4,極光嗰個綠圈徹底包圍!



我另一晚係kp5,好勁呀,個綠圈更闊了





昨日kp2,記得揀返Europe 先可以對照返個位置



日照時間,由於我哋要兼顧日間活動,而家呢段日子係永夜,太陽只會輕輕出現三個鐘....而且唔會升上水平線




天氣要咁睇,可以睇到每個鐘嘅天氣變化




俄羅斯摩爾曼斯克-四個市區出發追北極光tour及包車機場接送大比拼

俄羅斯摩爾曼斯克-四個市區出發追北極光tour及包車機場接送大比拼🌌



(上圖係Murmansk tour)


我繼續我嘅長篇大論俄羅斯極光攻略!

第一句先講明絕非廣告,我一蚊收益都冇㗎,我有返工唔使呢啲賺錢😝
極光tour價錢一般由$3000-7000盧布左右(約$338-790港幣)。非專業嗰啲2000-2500盧布都有,不過太平嗰啲我冇考慮,因為我對相片質素係有一定嘅要求,雖然我好慳錢,但我絕對唔介意比多一百幾十,等我可以留下漂亮嘅極光合照📷
全部公司價錢包含嘅嘢基本上一樣:酒店接送+專業極光人像照片send返比你+茶咖啡小食。時間都差不多,不過開始時間日日都唔同睇天氣,一般4-6小時左右,然後如果唔好彩睇唔到第二日好似唔使收錢,定係半價咁樣間間都差唔多(我冇睇唔到所以唔肯定價錢)。

相片係我對極光團最大嘅考慮,所以比較左四間公司(其中有兩間只係一個年輕攝影師兼司機,唔知算唔算係公司),四個都可以用WhatsApp或者WeChat聯絡,好方便。最後我用左其中兩間,再用左一間嘅包車,以下比拼一下各家特點:

第一間-Nord tour
好處及壞處:
-規模最大最正式,應該係最早開始做追光團嘅公司,wechat問價會email 回覆
-由於已經做起左,價錢特別貴
-相片質素極佳,專業攝影師隨行
-於很受遊客歡迎,所以有機會要同其他人拼團,咁攝影師就可能冇咁多時間淨係幫你影相

收費:
1 人包車 - 18000 RUB
2 人包車- 9000 一位 (total 18000)
3 人包車 - 7500 一位 (total 22500)
4 人包車 - 7000 一位 (total 28000)
10歲以下小童減2000 RUB,11-16歲青年減1000RUB

如果當日剛好有其他人拼團,一人收費就$7000RUB

我去俄羅斯追光無非都係為咗平,雖然佢啲相真係好穩陣好吸引,但太貴所以最後冇揀佢
https://nordtours.ru/en/
WeChat ID:wxid_hknnxi04vzbs22
What’s app: +79-217092546


第二間-Michael 攝影師


-收費比較平,因為佢係一個”個人”,並唔係乜公司,價錢可以商量,人多可以叫佢比折扣,人少都可以同佢傾下,反正佢係一個人比較易話為,你搵佢同佢講Joanne介紹佢話會計平啲(你自己deal,我唔知幾多)
-小團包車,剩係得我同行四個人
-攝影技術好,裝備充足👍🏼仲要超有熱誠,見到極光爆發佢都狂嗌😂狂影我地幾個人,絕不敷衍,係咁影我哋到我唔想影自己話夠,最後大約影左百幾張
-後生仔,識英文,雖然唔係好好但係絕對溝通到,呢個係重點
-經驗豐富,我哋跟佢嗰晚雖然指數高,但不停起雲,佢就車住我哋係咁望住個天轉地點,尋找冇雲嘅區域
-停留地點多,佢自己有好多心水嘅位置,我哋總共換咗四個地點
-絕對唔會匆忙,都唔會催促,我都係玩到自己夠皮嗌走(我個人咁爛玩好少夠皮😂所以真係玩咗好耐)

-時間:八點酒店接你,我大約玩到一點幾返去

-缺點真係冇乜,或者係勁chur我哋影人像極光合照,令到我冇時間玩我自己部相機,影唔到浄風景極光,我部相機幾乎冇影過相🤦🏾‍♀️

-之前我去阿拉斯加追光掛住影,到大爆發一刻我掛住喺度搞setting,無用眼睛好好欣賞,今次我醒目,我完全唔影,爆發一刻我淨係睇!相片我交俾Michael
-仲有一個缺點就係佢WeChat回覆得好慢

收費:$4000RUB一位,如果睇唔到好似半價(我冇睇唔到所以唔肯定),佢仲有其他日間活動包括teriberka day tour,薩米村一日遊,husky park tour,雪上電單車,機場接送等等,基本上就係嗰度有嘅活動都可以搵佢,book 極光tour再搵佢報其他活動可以八折,其他活動佢都會幫你影相,呢個係最大嘅好處~

Micheal的WeChat ID:
murmansutki
WhatsApp:
+79217083078
Micheal的Facebook page名,入面可以見到佢啲相:
Aurora Tour Tonight


第三間-Murmansk tour
-其實佢都係一個”個人”可能同幾個朋友一齊玩嘅tour公司仔,講完唔記得咗佢叫咩名添
-我係IG搵佢返嚟,睇中佢嘅就係佢啲相質素好好,角度構圖全部都靚,而且價錢唔貴
-缺點係佢唔識英文,真係溝通唔到唯有指手畫腳
-佢係一架八人定係九人車,我上車嗰陣見到已經有四個人,仲諗住有其他遊客拼團,點知唔係原來都係佢啲friend😂成班一齊出嚟陪佢,所以簡單來講其實我一行四人都係包車
-因為係一個人,所以好casual,你唔鍾意就可以轉地點,當日我都轉左一個地點,本身去咗一片空地,但係係好臭垃圾味同埋有光害嘅平地,而且當下極光不明顯,所以我就要求轉地點,佢就建議去比較遠嘅一個湖,我話OK,湖,效果真係好好因為有倒影!(micheal都一樣會去湖)
-佢有幫我地影合照,不過冇michael 咁多,大概之後有send返20張左右,都夠,反正影得幾靚
-你叫佢幫你影相佢一定會影,裝備都好好,尤其是打燈嗰盞燈,優質!有帶埋燈箱。
-我更加多時間自己玩相機創作,佢自己就喺隔離都好興高采烈咁自己行左落水玩
-佢啲朋友有幫我們照顧我父母,我父母有上車休息,佢哋仲幫佢痴暖貼😂到極光爆發就即刻通知佢哋叫佢哋落車
-整體來講都唔錯,不過感覺就業餘d,另外溝通有啲障礙所以感覺冇Michael咁熱烈

價錢:
我比左$3500RUB一人(我有四個人)
琴日問佢拎咗價目表
追光團:
1-3 人- 5000 RUB. per person
4-7 人 - 4500 RUB. per person
10 or more - 4,000 RUB. per person
個人啲價錢都係亂開嘅,即係標準價.....因為佢當初都係同我講4500RUB一人,我問返佢乜唔係3500RUB咩(IG寫),佢就答我係呀3500😂所以有興趣搵佢嘅自己再傾下~佢價錢都係無譜的,你問吓可能又會平啲。然後teriberka($4000RUB) ,Sami village($4000RUB),husky park($5500RUB)活動佢都有做,有興趣自己再同佢傾。
What’s app
+7 911 300-27-20
IG
murmansk _tours


第四間-雪松追光
佢係一個中國人住响當地,你可以WeChat入邊同佢講中文。但係今年佢已經冇自己再帶追光團,佢比左當地司機做(可能即係變咗中介)。
好處及壞處:
-相片質素非常一般,簡單來講我有要求所以不能接受😂如果你對自己技術好有信心或者對相片冇乜大要求就可以搵佢,最後我冇幫襯佢追光,幫襯左佢teriberka day tour
-識中文係佢最大嘅優勢,就算唔係佢接待你,你全程可以WeChat搵佢做交流,無論即時天氣或者其他嘢你都可以搵佢做翻譯
-例如我行李因為航空公司問題遲到,夜晚追光冇腳架用,問佢可以邊度買佢即刻答到你,我有直接同佢講我幫襯第二個追光,佢都冇乜所謂一樣幫你,到我teriberka day tour佢都有幫忙例如約幾點集合啊,司機未到你又可以追佢
-追光價錢平,包車價錢都係平(你去到搵可以更平,明知佢係中介但比較下佢都有優勢,我帶住父母,我想安排左先)
-搵佢來講呢,主要適合唔識英文而且對自己指手劃腳溝通冇乜信心,就可以考慮佢唔使煩
價錢:
$850RMB一細車 (約$8600RUB三人報價,注意不含拍照)
7人車包車 $1450人民幣(不含拍照,拍照另計)
$290RMB一位如果係同其他人拼團(含攝影)
我呢兩日問佢,佢話小車係$900人民幣($9100RUB/3=3033一位),如果係咁坐3人,其實價錢就已經無乜優勢,除非坐爆四人,但又會好迫....仲要唔包影相🤔
WeChat ID:
zhangxuesong208874

Teriberka day tour 我搵佢book就$970人民幣細車,$1200人民幣大車($12135/4=$3044RUB一人,咁比較入邊最平都仲係佢!)

但係機場接送唔好搵佢,因為佢唔係最平😂最後我仲有另外一個女司機介紹,女仔去特別啱用,尤其機場市區接送~


交通安排:特別推介女司機Tanya ⭐️⭐️⭐️⭐️⭐️
佢可能唔係最終極平,但價錢非常合理,為人親切可靠細心。我平時接觸俄羅斯人,一般都係極度冷淡,我識一個俄羅斯嘅機長講笑同我講話:冇人會對你笑㗎..對你笑嗰啲通常都有陰謀嫁😂其實係俄羅斯人比較內斂

我搵到佢其實係因為佢係我酒店幫我安排嘅機場接送,機場到市區單程大車$1400RUB,小車$1000RUB ,佢仲平過上面個中國人雪松。

好處:
-女仔,俾人感覺安心啲
-識英文溝通到,呢個好重要
-好細心
-價錢公道

關於佢嘅我仲想講多件事,由於航空公司問題,我班機降落之後好幾個人行李無到,漏咗喺莫斯科,包括我四個😭tanya係機場外邊等我等左好耐(注意返機場好細,我冇見到有的士,所以盡量都先安排接送),因為我要係入邊做埋啲遺失行李登記,佢入嚟搵到我,積極幫我填埋啲文件(俄文完全睇唔明,全靠佢幫我解決),而我所有厚衣服,鞋,腳架,化妝品都係我個喼入邊,我簡直就係欲哭無淚🤦🏾‍♀️呢個就係我做乜着裙睇極光嘅原因😂

Tanya知道咗佢勁貼心,佢留低左佢電話俾機場嗰個行李部,一路幫我跟進。最最最貼心嘅行為就係佢知道我夜晚要去追光,冇厚衫,佢返咗屋企打包左一大袋衫褲鞋襪頸巾冷帽手套,通通送過嚟我酒店俾我哋用!我簡直感動到哭哭~仲要冇另外收返我車錢。

到最後夜晚我出發左去追光圑,佢就自己揸車去機場幫我接返我啲行李(行李坐咗下一班機),沿途見到有北極光仲即刻影相俾我睇祝我追光成功。然後佢再送返行李去我酒店。本身我諗住佢來回去接個行李應該收兩程車費,誰不知最後都係收我單程。

所以呢個女司機我真係強推!!❤️❤️❤️

除咗機場接送,基本上上面四間有嘅活動都可以搵佢,包括雪地電單車,Sami village,teriberka day tour(5000RUB包午餐),teriberka two day tour(含住宿都係8000RUB),或者各種齋接送佢都有。

Tanya的what’s app
+66829147646

今日分析嚟到呢度,大家可因應個人需求再選擇下要用邊一個啦~下一篇我會再講其他實用資料,等我👋🏻不過可能要等多兩日,呢幾日要返工唔係好得閒寫字✍️

今日幾張相入邊敘述我會註明係邊一個影嘅,等大家方便比較!



Micheal團,中間嗰個就係Michael


出賣阿媽一張,michael 團


Murmansk tour團


Murmansk tour,整體都真係影得唔錯

強烈推薦女司機Tanya!

中國人雪松團,三個字形容,郁鬆矇

雪松圑,唔使打格仔都見到啲人面口唔清晰

雪松圑,面口清楚返,但係啲構圖😅


Nord tour,相片穩陣但係貴